युटोपियन शुगर्सचे बॉयलर अग्निप्रदीपन उत्साहात संपन्न
चालू गळीत हंगामा करिता 6.00 लाख मे.टना पेक्षा जास्त गाळपाचे उद्दिष्ट –उमेश परिचारक
मंगळवेढा प्रतिनिधी:- कचरेवाडी ता.मंगळवेढा येथील युटोपियन शुगर्स लि. या कारखान्याच्या 2024-2025 या अकराव्या गळीत हंगामाचे बॉयलर पूजन व अग्निप्रदीपन समारंभ सोमवार दि.21/10/2024 रोजी कारखान्याचे चेअरमन उमेश परिचारक व मुख्य कार्यकारी अधिकारी रोहन परिचारक यांच्या शुभहस्ते अत्यंत साधेपणाने उत्साही वातावरणात संपन्न झाले.
प्रारंभी कारखान्याचे डे. चिफ इंजिनियर श्री. सुदर्शन बर्गे यांच्या शुभहस्ते सपत्नीक सत्यनारायण महापूजा करण्यात आली.
यावेळी बोलताना चेअरमन श्री उमेश परिचारक म्हणाले की, आपल्या कारखान्याचा हा अकरावा गळीत हंगाम असून मागील दहा हंगामात युटोपियनने भरीव कामगिरी केली आहे. चालू गळीत हंगामात 6.00 लाख मे.टन ऊसाचे गाळप करून ऊसाच्या रसापासुन व बी हेवी मोलॅसेस पासून 1.50 कोटी लिटर इथेनॉल उत्पादित करणार असलेचा मानस आहे. चालू गळीत हंगामात ऊसाची उपलब्धता चांगली असून गत दहा हंगामात ऊस उत्पादक हे युटोपियन कारखान्यास ऊस देण्यास प्राधान्य देतात व यापुढे हे देतील अशी मला खात्री आहे.
या गळीत हंगामात कारखान्याचे मार्गदर्शक आमदार प्रशांतराव परिचारक यांच्या सुचने नुसार सांगोला-पंढरपूर-मंगळवेढा व मोहोळ या तालुक्यातील कारखान्याच्या सभासदांचा संपूर्ण ऊस गाळप केला जाईल. त्यामुळे ऊस उत्पादकांनी चिंता न करता कारखान्याच्या शेती विभागाशी संपर्क साधावा असे आवाहन ही परिचारक यांनी केले. कारखान्याने या वर्षी 10 हार्वेस्टर मशिन घेतलेल्या आहेत तसेच 200 ट्रॅक्टर, 150 मिनी ट्रॅक्टर या प्रमाणे करार केले आहेत.
यावेळी मुख्य कार्यकारी अधिकारी रोहन परिचारक म्हणाले की, संपूर्ण ऊसाचे गाळप करण्यासाठी कारखाना यंत्रणा सज्ज आहे. ऊस उत्पादक शेतकरी यांना दिवाळी सणासाठी प्रती किलो 25/- रु. प्रमाणे 10 किलो साखर वाटप करणेत येईल. सर्व कामगार वर्ग हा चालू गळीत हंगाम यशस्वी करतील अशी खात्री त्यांनी व्यक्त केली. सर्व कामगारांची दिवाळी गोड जाणेसाठी कामगारांना दरवर्षीप्रमाणे याहीवर्षी 8.33 टक्के बोनस दिला जाईल. या कार्यक्रमासाठी कारखान्याचे ऊस उत्पादक शेतकरी, खातेप्रमुख व कामगार मोठ्या संख्येने उपस्थीत होते.
कार्यक्रमाचे सूत्रसंचालन व आभार संगणक विभागप्रमुख अभिजीत यादव यांनी मानले.
