भगीरथ दादा भालके यांनी आगामी निवडणुकांसाठी बोलवली सर्व समर्थकांची बैठक!
(पंढरपूर नगरपालिका व पुढील निवडणुकांबाबत होणार आजच्या बैठकीमध्ये विचारविनिमय)
(भगीरथ दादा भालके निर्णय काय घेणार याकडे लागले दोन्ही तालुक्याचे लक्ष)
आगामी नगरपालिका निवडणुकांच्या पार्श्वभूमीवर, भगीरथ भालके यांच्या नेतृत्वाखाली आज एक महत्त्वपूर्ण राजकीय बैठक संपन्न होणार आहे.निवडणुकीच्या तोंडावर कार्यकर्त्यांमध्ये उत्साह निर्माण करणे आणि प्रभावी रणनीती निश्चित करण्याच्या उद्देशाने ही विचार विनिमय बैठक आयोजित करण्यात आली आहे.
बैठकीला पंढरपूर-मंगळवेढा मतदारसंघातील २२ गावे आणि मोहोळ मतदारसंघातील १७ गावे अशा एकूण ३९ गावातील भालके समर्थक मोठ्या संख्येने उपस्थित राहणार आहेत. आज दुपारी २ वाजता पंढरपूर येथील कोर्टा शेजारील भालके निवासस्थान येथे माजी चेअरमन भगीरथ भालके यांनी ह्या बैठकीचे आयोजन केले आहे. त्यांनी ज्येष्ठ मार्गदर्शक, पार्टी प्रमुख, आजी-माजी पदाधिकारी व कार्यकर्ते यांना उपस्थित राहण्याचे आवाहन केले आहे.
या बैठकीत प्रामुख्याने नगरपालिका निवडणुकीची तयारी, विविध प्रभागांमधील राजकीय स्थितीचा आढावा, उमेदवारांची निवड प्रक्रिया आणि कार्यकर्त्यांना जबाबदारीचे वाटप यावर सखोल चर्चा करण्यात येणार आहे. निवडणुकीत एकजुटीने काम करून यश मिळवण्यासाठी ठोस कृती योजना तयार करण्यावर भर देण्यात येणार आहे. नगरपालिका निवडणुकीच्या तोंडावर भालके समर्थकांच्या या एकत्रीकरणामुळे पंढरपूर आणि मोहोळ मतदारसंघातील राजकीय वातावरण ढवळून निघाले असून, त्यांच्या पुढील राजकीय हालचालींकडे सर्वांचे लक्ष लागून राहिले आहे.
