*मनसेचे जिल्हाध्यक्ष प्रशांत गिडे यांची सामाजिक बांधिलकी कायम; दिवाळी भेटीची १३ वर्षांची परंपरा अखंडित!*
*(मोडनिंब परिसरातील ग्रामपंचायत कर्मचारी, अंगणवाडी सेविका, मदतनीस, आशा वर्कर आणि कष्टकरी मजुरांना दिवाळीची प्रेमाची भेट)
सण-उत्सव हे आनंदाचे आणि आपुलकीचे प्रतीक असतात. मात्र आपल्या आनंदात समाजातील कष्टकरी घटकांचाही आनंद सामावून घेण्याची भावना खऱ्या सामाजिक बांधिलकीचे दर्शन घडवते. याच भावनेतून महाराष्ट्र नवनिर्माण सेनेचे जिल्हाध्यक्ष तथा तंटामुक्ती मोडनिंब समितीचे अध्यक्ष प्रशांत गिडे यांनी सुरू केलेली दिवाळी भेट देण्याची १३ वर्षांची परंपरा यंदाही मोठ्या उत्साहात कायम ठेवली आहे.
प्रशांत गिडे यांच्या वतीने ग्रामपंचायत कार्यालय, मोडनिंब येथे ग्रामपंचायत कर्मचारी, महिला कर्मचारी, अंगणवाडी सेविका, मदतनीस, आशा वर्कर तसेच परिसरातील कष्टकरी घटकांना मान्यवरांच्या शुभहस्ते दिवाळी भेटवस्तूंचे वाटप करण्यात आले.
गेल्या १३ वर्षांपासून कोणताही खंड न पडू देता दिवाळीच्या सणानिमित्त समाजातील विविध घटकांना भेटवस्तू देऊन त्यांच्या आनंदात सहभागी होण्याचा उपक्रम प्रशांत गिडे राबवत आहेत. विशेष म्हणजे, प्रसिद्धीपेक्षा सामाजिक बांधिलकीला प्राधान्य देत त्यांनी ही परंपरा जपली आहे.
ग्रामपंचायत कर्मचारी, अंगणवाडी सेविका, मदतनीस आणि आशा वर्कर या ग्रामीण भागातील व्यवस्थेचा महत्त्वाचा कणा आहेत. गावाच्या विकासात, आरोग्य सेवेत आणि बालकांच्या संगोपनात त्यांचे योगदान मोलाचे आहे. त्यांच्या कामाची दखल घेऊन दिवाळीच्या निमित्ताने त्यांचा सन्मान करणे ही निश्चितच कौतुकास्पद बाब आहे.
दिवाळी भेट ही केवळ वस्तूंचे वाटप नसून समाजातील कष्टकरी भगिनी आणि बांधवांप्रती व्यक्त केलेली कृतज्ञता, प्रेम आणि आदराची भावना आहे. सणाच्या काळात प्रत्येकाच्या चेहऱ्यावर आनंद फुलावा, त्यांनाही आपलेपणाची जाणीव व्हावी, या उद्देशाने हा उपक्रम सातत्याने राबविला जात आहे.
केवळ दिवाळीपुरतेच नव्हे, तर इतर सामाजिक व सार्वजनिक उत्सवांमध्येही प्रशांत गिडे हे नेहमी सक्रिय सहभाग घेत असतात. परिसरातील गोरगरीब नागरिकांच्या अडचणींच्या काळात मदतीचा हात पुढे करणे, सामाजिक उपक्रमांना सहकार्य करणे आणि सर्वसामान्यांच्या सुख-दुःखात सहभागी होणे, यामुळे मोडनिंब परिसरात त्यांनी आपुलकीचे आणि विश्वासाचे स्थान निर्माण केले आहे.
आजच्या धावपळीच्या आणि स्पर्धेच्या होत चाललेल्या सामाजिक वातावरणात एखादा उपक्रम सलग तेरा वर्षे कोणताही खंडाविना सुरू ठेवणे ही साधी गोष्ट नाही. सामाजिक जाणीव, माणुसकी आणि सेवाभाव यांचा सुंदर संगम असलेली ही परंपरा इतरांनाही समाजासाठी काहीतरी करण्याची प्रेरणा देणारी ठरत आहे. प्रशांत गिडे यांच्या या उपक्रमातून सामाजिक बांधिलकीचा आदर्श निर्माण होत असून, मोडनिंब परिसरातून त्यांच्या या कार्याचे कौतुक होत आहे.
या दिवाळी भेटवस्तू वाटपप्रसंगी प्रकाशजी माळी, महादेव दिघे, हनुमंत यादव, जाडकर साहेब, पै. सूरज जाडकर, दत्तात्रय सुर्वे, पत्रकार मारुती वाघ, रमेश शिरसट, अभिषेक पवार, संतोष घोळवे, अरणाकाका सुर्वे, शुभम गायकवाड, सचिन खरे आदी मान्यवर उपस्थित होते.
