18 टक्के बोनस जाहीर, नियमानुसार टेम्पररी होणार हंगामी, हंगामी होणार कायम कामगार
सेवानिवृत्त कर्मचाऱ्यांचा सोन्याच्या अंगठ्या देऊन केला सपत्नीक सत्कार
श्रीपूर ता.माळशिरस येथील श्री पांडुरंग सहकारी साखर कारखान्याचे माजी चेअरमन कै.सुधाकरपंत परिचारक यांच्या 86 व्या जयंती निमित्त पांडुरंग कामगार कल्याण मंडळाकडून विविध कार्यक्रमांचे आयोजन कारखान्याच्या गणेश हॉलमध्ये करण्यात आले होते.
कार्यक्रमाचे प्रास्ताविक कार्यकारी संचालक यशवंत कुलकर्णी यांनी केले, यावेळी मालकांचे जुने सर्व सहकारी, सभासद शेतकरी, अधिकारी, कामगार यांच्या उपस्थितीमध्ये सुधाकरपंत परिचारक यांच्या प्रतिमेचे पूजन करण्यात आले. यावेळी मालकाची प्रतिमा असलेले कॅलेन्डरचे प्रकाशन करण्यात आले. सेवानिवृत्त कर्मचाऱ्यांना सोन्याच्या अंगठ्या घालून सपत्निक सत्कार करण्यात आला. शेतकऱ्यांना हुमनी पासून रोखण्यासाठी प्रतिबंध म्हणून औषधे वाटप करण्यात आली. पांडुरंग सायकल क्लबच्या सर्व सायकल रायडर्स व त्यांना मार्गदर्शन करणाऱ्या कोच चे सत्कार देखील यावेळी करण्यात आले. कार्यक्रम संपल्यानंतर सर्वांना जेवणाचा महाप्रसाद देण्यात आला.
यावेळी चेअरमन आ.प्रशांत परिचारक यांनी पांडुरंग कारखान्याच्या कर्मचाऱ्यांच्या हातामध्ये सेवानिवृत्त होताना त्यांचा सत्कार करताना दोन अंगठ्या दिसत होत्या. आज आम्ही भेट म्हणून तिसरी अंगठी देतोय. यावरून पांडुरंगाचा कर्मचारी आर्थिक दृष्ट्या सक्षम आहे. आम्ही कामगारांचा पगार कधी ही थोपविला नाही. त्याचबरोबर शेतकऱ्यांचे देखील ऊसाचे बिल कधीही थकविले नाही. त्यामुळे आमचा कामगार आर्थिक दृष्ट्या सुदृढ असल्याचे दिसून येत आहे. मालकाच्या जयंती निमित्त व दिवाळी सणानिमित्त पांडुरंगच्या कर्मचाऱ्यांना 18 टक्के बोनस जाहीर करण्यात आला. त्रिपक्षीय समितीने केलेली 12 टक्के पगारवाढ, टेंपररी कामगारांना हंगामी करणे व हंगामी कामगारांना कायम करण्याची घोषणा यावेळी करण्यात आली
या जयंतीच्या निमित्ताने प्रा.बाबासो परीट यांचे ‘या जन्मावर, या मरणावर शतदा प्रेम करावे’ या विषयाचे व्याख्यान संपन्न झाले. यावेळी परीट यांनी कै.सुधाकरपंत परिचारक यांच्या सर्वकार्याचा, कारखान्याच्या प्रगतीचा अप्रतिम आढावा सांगितला. यावेळी सर्वजण मंत्रमुग्ध झाले होते. कार्यक्रमासाठी व्हा.चेअरमन वसंतनाना देशमुख, मा.चेअरमन दिनकरभाऊ मोरे, कार्यकारी संचालक डॉ.यशवंत कुलकर्णी, आजी माजी संचालक, सर्व अधिकारी, ऊस उत्पादक शेतकरी, परिसरातील मान्यवर, युनियन प्रतिनिधी व कामगार उपस्थित होते. कार्यक्रमाचे आभार दिनकरभाऊ मोरे यांनी मानले तर सूत्रसंचालन डॉ.सुधीर पोकळे यांनी केले.